婆媳關係

其實好感恩，因為我嫁咗個好奶奶．．．哈！
我成日講，嫁個好老公，不如嫁個好奶奶，哈哈哈！！
我奶奶真係好好架～因為佢性格好溫馴
同老公拍咗10年拖，結婚同佢一齊住哩３年，都未見過佢發脾氣！
我脾氣咁難頂佢都頂得順真係好好架啦～哈！

相處好同住難，其實都係架！因為2個唔同性格或生活習慣唔同O既人要突然之間同住埋一齊，真係要一段時間適應架～而且大家都要有好好O既包容度才可 ！講真，我自己都唔敢話我同我老公好夾啦～而我又唔係一個好勤力O既人~係屋企，我都比較少幫手做家務！有時會覺得，如果幫得太多，佢會唔會覺得我搶埋D嘢做 ? 唔做又好似唔係咁好咁?同埋放假有時我都瞓到好晏，我奶奶對我無微言，當然我唔知佢係我背後有冇講啦，但我都唔想咁諗！可能諗得多可以當真O既都唔定，竟然唔知就唔好諗啦！

懷孕、坐月期間、到依家，我奶奶都係視我如半個女咁，愛烏及屋！

懷孕期間我想食咩都煮俾我食，我一出聲佢就會煮，依家都係架！
食完晚飯去散步，老公唔得閒佢都會陪我！唔俾我做家務！

坐月時好早就起身煮早餐俾我食，夜晩幫我湊小朋友，讓我有多D時間休息！

依家幫我湊小朋友，我一句話要出街就出街。食完飯仲讓我同阿仔玩～

其實真係要將心比己，你點對佢，佢就點對你！俾奶奶湊一定好過俾工人湊吧（當然有Ｄ媽咪係逼不得已）

而我有咩都會直接講出嚟，一家人嘛，點解要將Ｄ嘢收收埋埋？如果你唔講，佢又點會知呢～好似同老公O既關係一樣啫嘛~

而我都聽到D媽咪真係好唔鍾意個奶奶，幫手湊之餘仲唔想奶奶錫下個孫，當然一家唔知一家事～我覺得有人錫個仔，好過無吧！

多Ｄ包容，真心對待才能長久喔！

對嗎！

懷孕回顧(1) - 妊娠糖血

好耐無上嚟啦，因為我已經係一個媽咪啦～嘻嘻

係仔嚟，依家都20個月啦~時間真係過得好快呀~~~~

而係整個懷孕過程中，都算舒服，孕吐都比較少，只係唔開胃，同埋都係嘔咗1-2次左右！

因為我係瘦底，所以都無咩點重到～

但好可惜，萬萬意想不到o既係，我竟然中心姙娠糖尿呀～～天呀～真係晴天霹靂呀！

我又唔係肥咗好多、又唔係高齡、但竟然中咗～9.7左右

不過醫生都話有時係因為胎盤影響都唔定～

咁都已成事實，所以我都接受咗，而且好乖咁聽醫生姑娘o既指示啦~

每星期指定時間吉手指測血糖～

有好多媽咪都話血糖餐都係食唔飽～但其實我發現，係可以食飽架～

只要每餐食完之後一定要散步半小時，又唔一定係落街行～

到咗後期，我自已只係o係屋企散步半個鐘都可以Keep到呀~所以大家要加油~

而妊娠糖血機我買咗哩部：其實有D媽咪會租，價錢其實唔差得遠，所以最後都係決定買啦～

一星期拮3日，每日拮3次，係食完飯後2小時要Check，到咗後期，真係拎起部機都驚，但為了BB，無計！